謝謝儂 (V City) (Closed)

入黎屯門拜完年，黎左食d野，餐廳裝修得幾靚。我地下午2點幾黎到，見有午市同下午茶套餐供應，幾吸引。天花板吊燈好有特色，喜歡。中意食小籠包，見到心諗要食。小籠包 $36就咁睇都見佢包左唔少湯汁，要趁熱食，一咬開鮮味湯汁流出，做得有水準。皮簿但唔易穿，多汁！爆汁煎小包 $38哩個幾特別，似係煎過既小籠包，個底煎得好香，又係多汁，好食。下午茶套餐- 黃金炒飯 送豆漿 $42好抵食，黃金炒飯色澤真係好金黃，賣相吸引。粒粒飯都包住咸蛋黃，咸香味好夠，但飯既水份唔夠，較乾身。擂沙大湯丸 $38哩個甜品好食，推介！6粒湯圓大粒，係黑芝麻味，非常軟，上枱時熱辣辣，襯熱食，好食！多芝麻，皮簿煙韌。桃膠桂花凍 $36一見桃膠同桂花即刻好想食，係我中意食既食材，凍糕好清涼，桂花香味都食到，杞子明目，桃膠滑，落左唔少，正！