恆河咖喱餐廳 (Closed)

已經有一排冇嚟，星期六再嚟幫襯，要咗兩款set lunch(@33)：分別係咖哩羊仔肉同巴基斯坦式牛腩，都係要咗跟naan；另外加$5要兩件烤魚。餐湯係紅湯，淨係見有啲蕃茄，唔知重有啲乜嘢材料，味道就咸咗啲。烤魚細細舊，整得幾香脆，又係咸咗啲，不過$5貨仔可以收貨喇。之後羊仔肉同牛腩一齊上，我先試咖哩，食到裏面有蕃茄碎、洋蔥碎同一啲香料，酸酸哋，不過覺得差唔多係唔辣，後尾聽waiter同另一檯客講，原來冇特別出聲就係小辣，但係呢個小辣嘅程度真係太過輕喇。跟住試羊肉同牛腩，都幾淋，羊肉重保留啲臊味，算唔錯，不過每樣得三、四舊，少咗啲。Naan就好多噃，而且幾軟熟，食得飽飽的，係嫌蒜味太輕。餐飲要熱咖啡同奶茶，亦不俗，其中咖啡相當濃，啱我，老婆就覺得難入口啲喇。