黑木堂

Open Now

Now Closed

去完奧海城睇戲，唔想去大商場食連鎖餐廳一直行到去大角咀區尋找小店。今次搵到呢一間裝修充滿日式風味嘅日本料理餐廳。全店以木色做主題，座位多但相對比較逼。店內有不同嘅擺設，有唔同嘅畫同埋唔同款式嘅飲品做裝飾。店內有優惠，凡惠顧滿$200便可以享有特價小食。於是我哋叫咗兩個刺身丼同埋一串雞軟骨，剛好夠數。海鹽燒鯖魚$32用筷子一夾開魚肉，啲魚油直情係湧出嚟！師傅功夫好！完全做到外皮脆，但係肉質唔會過老。食完之後口腔仲留停住魚油的香味，好滿足。海鹽燒雞翼雞翼皮夠脆，溫度亦夠。加入少少檸檬汁去一去油膩感，正！醬汁燒廣島蠔雖然明知道熟蠔其實唔會係新鮮既蠔，但係咁樣燒法再加埋一啲類似沙律醬，少少酸嘅汁配搭起上嚟有幾match喎！我哋叫咗兩款刺身丼，貴啲嗰款係有三文魚腩，只係覺得太薄片，海膽嘅鮮味一般。反而欣賞平$20嘅三文魚配帆立貝丼，雖然張厚切嘅帆立貝劏開一半咁擺，份量唔算多但係都尚算鮮味。香港地鋪租咁貴，周圍都係連鎖鋪頭，一般小店都好難經營。所以我一直都好鍾意去大角咀區既小店，雖然價錢唔算特別平但係好有個人風格，希望大家繼續支持。