1988 (Closed)

窗上貼咗可愛風嘅圖案, 離遠已經吸引住我, 一於上去棟工廈搜尋呢間餐廳。上到去發現原來係一間泰國餐廳, 不過充滿少女嘅感覺。🥢雜錦海鮮冬陰功湯河個冬陰功湯底同平時飲嘅冬陰功湯好似, 唔會淡茂茂, 亦都唔會太辣。河粉偏幼, 好煙韌, 有咬口。連我最唔鍾意食嘅芽菜都好爽脆, 夾埋一齊食係好味嘅。🥢泰式燒豬頸肉飯豬頸肉燒得好香, 不過略嫌切得比較薄, 食落口無乜質感。配合一個特別嘅泰式醬汁一齊食, 幾開胃。🥢蝦餅蝦餅整到好似蝦嘅形狀, 大大隻, 食落口啖啖肉, 真係會食到蝦肉, 上枱仲要係熱辣辣, 正!🥢泰國街頭雪糕 (椰子味)本來以為無乜特別, 不過一上枱已經比佢吸引住, 無諗過一杯普普通通嘅椰子雪糕, 會放得咁靚, 好似甜品舖咁有特色。味道上有濃濃嘅椰子味, 唔會太甜, 配合埋椰子肉一齊食, 口感層次提升咗。🥢椰汁芒果糯米飯芒果夠熟, 所以唔會覺得酸。糯米飯做得比較黏, 椰汁亦偏甜, 所以會有飽滯嘅感覺。整體食物都好食, 不過飲品係用泰式茶底, 飲唔慣就會覺得有d 怪, 餐廳職員都好有禮貌, 服務態度偏好, 係值得再去嘅一間餐廳。