Ha Noi 越南菜

Open Now

Now Closed

之前喺重慶大廈地庫呢度睇開波鞋，今次經過發覺唔同曬，格局變咗有好多間細舖甘，行去入邊見到有間越南嘢都幾多人食，門口嘅姐姐都好熱情，一於入去食個晚餐！餐廳入面位置好多，枱同枱之間有隔板之餘仲有一定距離，疫情之下都可以食得放心啲！裝修方面有好多越南相關裝飾，例如草帽、竹牆，仲有一面大壁畫，好有心思。極品牛三寶湯河粉（$70）牛三寶有生牛肉、牛展、牛丸，生牛肉夠薄好快熟，個人幾鐘意粒牛丸油香好足！濃郁鹹香湯底配上滑溜河粉，擠啲青檸汁加辣椒，pho味返曬嚟！順化豬肉卷撈檬（$64）順化豬肉卷係類似腸仔，外面烤到焦香，豬肉肉餡有豐富油脂，配清新酸辣撈檬好夾。酥香軟殼蟹（$42）原本諗住食軟殻蟹撈檬，最後無揀但原來可以加錢叫小食，果然要點，炸到鬆脆香口！凍越南滴漏咖啡（+18）煉奶底再加上香濃越南滴漏黑咖啡，因為越南咖啡豆同咖啡酸味同苦味較重，當地人就加入煉奶去調和，變成獨特嘅越南style，入口較甜但唔過膩！椰果椰汁西米露（+$12）椰味香濃，椰果加上西米口感豐富。