寬巷子 (Closed)

多得我哋嘅天才正苦，繼續免檢疫放人入嚟，似乎出街食碗安樂茶飯嘅日子，繼續遙遙無期。☹️​唔出門，只好繼續回顧之前食過咩好西囉～今日分享嘅係台北過江龍「寬巷子」！熟台灣嘅朋友，應該都聽過呢間火鍋店～主打將藝術與飲食融為一體，所有菜餚都極之精緻，靚到人唔捨得食！💕​因為故友重聚，今次叫嘢食都幾乎無睇價錢，然後就荷包重創～😂席上其中一位台灣友人仲笑話，呢間店確係台北麻辣鍋嘅巔峰，不過唔係指最高級，而係指價錢🙈言歸正傳，古厝板門、燈籠、花卉油牆，我真係好鍾意寬巷子古色古香嘅感覺。店子仲有一排位置對正維港（可惜嗰日我哋Book唔到），係度打邊爐真係勁奢侈！😍打開menu，先揀湯底，今次我就揀咗「紅泥小染」及「貢布豬肚湯」～紅泥小染係四川辛辣鍋，入面幾多鴨血，麻辣得嚟幾惹味；貢布豬肚湯則胡椒味、藥材味較重，幾滋補。每個鴛鴦湯底中間仲有個麻辣醬，嫌湯底唔夠辣，可以再點呢個汁～辣怪應該好開心～（我就不了😂）另外，佢哋仲可揀豬骨湯、2款雞湯同茶樹菇湯（素），合共6款選擇。寬巷子最出名係製成花形嘅肉花盛合，呢款盛合都係用來自日本、澳洲嘅和牛，肉質鬆軟，肉味濃郁又甘甜，滾兩滾食得，入口即化，味道方面真係無得輸