利寶閣 (Closed)

朋友話想食下點心放題，咁就搵左呢間黎試下，坐享維港景色，環境亦非常亮麗優雅，感覺舒適。午市放題先送原隻鮑魚酥，鮑魚都幾大隻，都算彈牙入味，偏凍既，個酥就暖既幾酥脆。再送花膠灌湯餃，花膠無腥味有口感，個灌湯餃都幾大舊，入面充滿湯汁，鮮蝦爽口。晶瑩鮮蝦餃同鮮蝦水晶餃都係必嗌既，晶瑩剔透，皮薄涵靚，新鮮爽口，好食到都唔記得相機食先。百花燒賣皇都係值得嗌，新鮮熱辣辣，幾有咬口，如果鐘意食鵪鶉蛋都可以試下鵪鶉蛋燒賣。腸粉既皮還可以，偏薄，最好食係原隻鮮蝦腸，啲蝦好爽口。仲有唔少得既係炸點，燒汁木魚釀茄子、香煎韮菜魚餅同春卷都好值得推介，新鮮熱辣辣，茄子整得好入味，魚餅同韮菜都幾夾，比預期好食，春卷皮薄又脆，值得一試。仲有醬皇蒸鳳爪，個醬汁都幾濃郁，如果鳳爪可以整淋啲就更好。