高麗軒韓國料理 (Closed)

好耐冇食過韓國燒肉，搵咗呢間喺尖沙咀嘅高麗軒，晚市$278任食，我仲另外加咗$68，追加食埋靚肉同埋海鮮～餐廳都幾大，傳統韓國燒烤餐廳格局，店員都積極主動有禮貌。飲品有汽水、茶同埋果汁，可以自取。冇自取區，QR code落單叫嘢食好方便。燒嘅有牛肉、豬肉、雞、羊肉、海鮮等等。另外仲有韓式前菜、熱食、炸物、湯，都係可以任點任食。個人推介Prime雪花牛肉，雪花分布平均，肉質美味！帶子大大隻，上面仲有蒜蓉添，蒙古羊肉味道都好特別。海虎蝦雖然唔大隻但係都新鮮彈牙～前菜我叫咗泡菜、蘿蔔、菠菜同埋芽菜，都有幾款選擇。熟食就叫咗泡菜湯，入面有泡菜同埋豆腐，辣辣地特別開胃。