糖百府 (Closed)

今日(24-7-2009 Fri)同男友o係添好運食完晚飯,就依計劃行事,o黎糖百府食聞名已久o既雪花冰喇.諗住行過對面,點知原來佢就o係正隔離.由於時間尚早,暫時冇乜客,我同男友可以任坐,都係坐o左最埋邊o既位,由於男友前日至o黎食過,以佢o既經驗話我知,要兩個人食一個,而佢係食o左朱古力味,所以我o地今次揀$35.00o既咖啡味.等o左一陣,大大座o既雪花冰到o黎.底下有佢menu所講o既紅豆,小丸子同咖啡凍,面上有名叫彩針o既糖,但佢menu上寫有焦糖,我又唔係好覺有喎.影好靚相就開餐喇,咖啡味唔太濃亦唔太甜,o岩o岩好.口感真係好好,入口即熔但仍好凍,好過食刨冰又凍又要咬.而最欣賞佢就唔同刨冰咁,冰係淡淡o既白開水,o係面上淋啲糖漿.呢個係先開好咖啡雪成冰至炮製,所以啲冰係有味道.而底下o個三樣o野就唔係好多.紅豆夠腍,小丸子煙韌又飽肚,咖啡凍好細粒,食唔出咖啡味.服務:冇問題,勁好吖.環境:人多時應該都幾迫,都係o個句,旺角只有少數食肆座位唔迫.