Girlboss by Master Kama (Closed)

今日同兩個朋友約左去屯門市廣場睇戲，睇完剛好係晚飯既時間。行左一陣俾呢間girlboss master kama既顏色鮮明既裝修吸引左，晚飯時間人流都有少少多，但等左10分鐘左右就可以入座，侍應生都好有禮貌。一打開餐牌見到菜款好多，令我一時之間都有少少心大心細。香烤焦糖黑醋豬肋骨 配 和風柚子沙律 及 薯條 $118 - 老土d講句真係一次過滿足哂你三個願望，豬肋骨既肉質唔錯，份量都幾多但好彩佢唔會好肥，黑醋配焦糖酸酸甜甜好開胃，值得一提既係佢除左薯條仲有蕃薯條呀！係愛呀哈利。Shake Shake單骨雞翼 $68好好食，本身我唔太食煎炸野，但佢個調味粉好香(海苔)，雞翼都唔會算好油。講到成餐晚飯既重點絕對係 香煎鵝肝海膽溫泉蛋飯 ＄168，我估應該係用左加拿大海膽，海膽好新鮮！淨係呢四舊海膽我覺得成碗飯已經值回票價，我先食左一半海膽，將溫泉蛋同海膽拌好飯之後，一啖飯一啖鵝肝，簡值係人生一大快事。低溫慢煮法國黃油雞＄118 係最後一樣上既菜，以個人既經驗，判斷雞煮得好唔好一定係食雞胸，雞肉肉質岩岩好，食落好香雞味。睇黎以後係屯門食西餐又多一個好去處喇！