和処 酒肴 (Closed)

之前聽朋友介紹在漆咸圍有一間隱世日本人開的日本料理店，這條街唔多人行，若然非熟客，唔會搵到來，和処酒肴個名非常貼切，因為日本人老闆亦是一個喇酒師，三款廚師發板都可以揀配酒或甜品，甜品係另一個位胃，仲駛乜諗，如果要飲酒一杯又唔夠，所以梗係揀甜品。七道菜式，前菜及甜品最精彩。以為師傅送隻船上來，隻碟真係長，裏面有近乎10樣嘢，全部師傅自家製，盒仔裏面是酒盗螢光魷魚，幾鹹，左至右數過去有豬肉卷、海膽豬肉卷、雞肉卷、明太子汁雞肉卷、手握及一些漬物，與別不同，師傅真係有料到。三款刺身比較普通，鰤魚、左口、螢光魷魚，唔知點解師傅咁鍾意螢光魷魚，咁快又重複。接下來先熟食，有炸櫻花餅、煎油甘魚，兩個比較櫻花餅好食，油金魚過鹹肉唔算滑，送酒就啱。跟住又係熟食，海鮮千層蒸，又幾特別，黑松露油很香。以為剛才嗰隻碟好長，原來呢隻先叫做長，估計有二呎長，兩個人份量每人八件壽司一隻碟出齊，真厲害。最欣賞都係甜點，幾靚又多花款，玻璃杯裏面是柚子雪糕配雜果蘆薈梳打，仲有一粒紅豆糯米糍，碟上有柿乾桃子餅，細碟上有椰子朱古力及朱古力芝士蛋糕，極之豐富，樣樣都好食，唔會太甜，好感多元化，點會唔滿意。