金坊泰國美食

Open Now

Now Closed

好耐冇食過船河，今日突然好想食，見到金坊泰國菜好多人排隊，即刻又排埋一份先，呢間泰國菜館，好似好多年前喺荃灣食過， 印像中好似都唔錯嘅。等左一陣，咁啱到左下午茶時段，仲好添，平D丫嘛。坐低即刻order 左個魚蛋船河$46，下午茶仲有小食同飲品。真係抵食！重點係D野好唔好食，碗船河一到，睇落唔錯，湯底好濃，真係好有泰國風味，魚蛋好彈牙，細細粒幾好食，河粉真係泰國濶身嗰種，唔知呢間舖頭係咪真係泰國人主理既呢？食泰國粉另外一個重點，緊係D辣粉，辣魚露啦，呢度都有呢D調味料放喺枱度，等你整色整水，真係好似返泰國咁，好正。不過小食就麻麻地，雞軟骨餃子好硬同埋唔熱，可能係一早整定既關係，所以唔好食。凍奶茶就係一般港式既味道，唔係泰式既，不過都好飲，同埋好大杯。另外仲叫左海南雞船河 $46，湯底都係一樣咁好味，不過D雞就嚡D。另一個小食，紅咖喱蒜蓉包都係唔好食，個咖喱有D奇怪，椰汁味又太重，蒜蓉包又係唔熱既。總括喜歡船河個湯底及河粉好似幾正宗。不過D餸同小食就真係麻麻地，下次去唔叫小食都無損失。