MKT - Mong Kok Teppanyaki (Closed)

最近發現旺角花園街開咗間新店，主打幾款鐵板燒套餐，一至日都有供應，入座起計75分鐘，一定夠食😂 裝潢時尚，以墨綠色為主調，有鐵板座位可以近距離欣賞師傅表演💪🏻先送上前菜同田園沙律，新鮮、健康，食緊嘅時候師傅就會開始大顯身手，近距離望住佢烹調美食真係幾fun，簡直係視覺同美國嘅雙重享受呀～ 全部食材都灑上鹽、牛油等調味料，唔使點前面嘅三款醬汁都已經夠晒味～ 個人最推大蝦，燒至金黃焦香，爽口又彈牙，鮮滑鹹香，仲有濃稠嘅蝦膏作調味，好想加點食多幾件🦐 肉類有豬有牛，師傅建議五成熟，內裡包住蔥花同蒜片，肉汁豐富，入口滑嫩，香濃惹味，令人難以抗拒呀！湯頭鹹香，熱辣辣，入口滑順，好暖胃～ 炒飯要咗牛肉同煙肉各一，米飯炒至乾身，粒粒分明，加入香蔥、雞蛋等材料爆炒，超級香噴噴！甜品有焦糖吐司，以大量牛油同白砂糖香煎，好肥但好好食，最後以飲品作結，草莓奶係小朋友之愛，竟然仲有腐竹雞蛋特飲，值得一試😃