韓日屋燒烤放題 (Closed)

呢間韓燒好似幾多元化咁，唔止有韓國嘢，仲有日本嘢。而Openrice 又咁多好評，咁就俾個機會試下。上到去除咗見到好大個招牌，仲有好香燒烤味。環境就一般啦，店方似乎係想用哂所有位置，所以都幾迫下。價錢$199加一食2個鐘，最初以為唔係好夠時間，原來個爐都好快燒熟啲嘢，同埋唔會好易燶哂。侍應都會主動換牛油紙。雖然主打韓式，刺身都有十款左右，每樣都幾新鮮同有冰雪住。好難得韓燒有得任叫海鮮，我哋叫咗帆立貝、生蠔、海蝦、仲有海鰻，不過有啲掛住食唔記得咗影相。帆立貝連殻不過比較細隻，味道方面好似無點調味，如果有少少調味應該更加好味。生蠔都係細隻，底下有少少粉絲，有鮮味唔腥。海蝦同海鰻味道正常。之後仲叫咗軟殼蟹同海蝦天婦羅，炸粉唔厚，不過唔係款款都熱。軟殼蟹就唔熱喇！到咗肉類方面，我哋叫哂咁多款牛，其中岩燒一口牛同芥末一口牛都唔錯，肉質有咬口，味道都可接受。其他就唔推介了，因為唔係特別好味又阻咗個爐好多位。除咗汽水仲有啤酒任飲。甜品奶凍都唔錯，奶味幾香唔太甜。