鐵堂 (Closed)

星期六放工同同事食飯，揀咗呢間位於白加士街嘅新餐廳，店面裝潢簡潔，帶有濃濃嘅和風。午市有金銀銅鐵四款套餐，仲做緊優惠，第二位半價，套餐內容豐富，性價比高。同事揀嘅鐵餐有和風牛蒡、芥末八爪魚、蔥燒牛小排同月見飯，本來仲有一道薄燒牛舌芯，不過牛舌芯已經售罄，所以牛小排俾多咗份量。前菜感覺清爽，特別係芥末八爪魚，非常清新開胃。牛小排嘅份量的確係特別多，蔥燒味道唔錯，亦唔會遮蓋牛肉嘅味道，值得一讚。我叫嘅銅餐同樣豐富，有醃蘿蔔、芝麻八爪魚、黑松露芝士炸蝦、牛油帆立貝同味噌湯烏冬。炸蝦即叫即製，口感香脆，沾上特製嘅黑松露沙律醬，更加惹味。帆立貝大大隻，用牛油煎到兩面金黃，香氣撲鼻，入口啖啖肉，令人滿足。見到門面令人以為係貴價日本菜，估唔到可以食到價錢咁親民嘅午市套餐，除咗套餐之外，仲有刺身、壽司同燒肉，下次可以一試。