酒盗 (Closed)

呢間餐廳好想試好耐，我第一次去嘅時候係平日佢已經滿晒座無位，亦都證明呢間餐廳應該唔錯，入邊個侍應好好人好有禮貌叫我地下次去嘅時候記得訂位，所以大家想試就記得要打電話去訂位。我第二次係前一晚打電話訂咗位先去，入到去間鋪頭好細間，切魚生嘅位係開放式嘅，而啲位係圍住切魚生嘅位，即係話可以望住師傅去切魚生，入面好乾淨好衛生。我哋兩個人食晚巿，一個人叫咗一個海鮮魚生飯，另一個人就叫咗八件壽司。海鮮丼 $148，好豐富，有甜蝦三文魚吞拿魚茸帶子三文魚籽八爪魚仲有蟹鉗肉，啲魚生食得出係好新鮮好鮮甜啲，吞拿魚茸係入口即溶，咁既價錢咁既質素係物有所值。八件手握壽司$158，壽司大小啱啱好，唔會太大唔會太細，個魚生師傅會根據唔同嘅魚生去放唔同份量既芥末，啲魚生一樣好新鮮，同埋魚生嘅厚度同飯嘅比例啱啱好。總結來講，呢一間小店有專業嘅師傅，而且食材好新鮮又有素質，咁既價錢唔算太貴，值得一試。如果午巿嘅時候來食價錢會更加平。