小火焰韓式咖啡廳 (金山樓) (Closed)

以前食過觀塘嘅小火焰餐廳，真係食過返尋味。今日嚟到大圍嘅分店，一樣冇令我失望。不過好少午餐嚟到呢度食，發現價錢比起晚飯更加實惠，食物性價比超高。午市套餐包飲品，或者加錢轉特飲。忌廉蟹肉餅（ $16 ）肉餅金黃香脆，裏面充滿着豐富濃厚既忌廉嘅蟹肉。一定要叫！大醬牛肉粉絲鍋（$68）食物到既時候個鍋中係沸騰中，大醬湯好飲，但稍嫌味道較淡，而且粉絲唔夠嚼勁， 有啲淋， 勝在肥牛又香又嫩補救。拉絲芝士烤豬肉拌泡菜炒飯（$78）$78食到個咁大兜，而且真材實料嘅泡菜炒飯真心抵。超邪惡既拉絲芝士同埋燒烤醬汁，一啲都唔吝嗇， 我都唔想諗食咗幾多卡路里。豬肉質感有啲似漢堡扒，比起烤豬肉，我認為BB豬肋骨比較好食，大家可以揀呢一款。同埋請注意綠色嘅係辣青椒，本身以為係普通青椒，點知一食，即刻想噴火😂鍾意食辣嘅可以挑戰下。紅柚荔枝梳打（+$28）正常發揮， 荔枝味特濃，味道偏甜，梳打冇乜氣。但係打卡一流。岩鹽焦糖咖啡（+$10）超香濃嘅焦糖咖啡，每次嚟到都一定係叫呢款。奶味同咖啡味都超濃，上面仲有一層厚厚既忌廉，邪惡得來，令人又愛又恨。而且焦糖分量適中唔會太甜。