岡一拉麵 (Closed)

好耐冇去屯門，當然要搵吓值得支持嘅餐廳啦。紅橋嗰邊有好多良心小店，呢間平民日式拉麵店就係其一，最平唔使四草嘢就有碗拉麵，真係邊度搵，而且質素絕對對得住個價錢有凸。叉燒拉麵（$42），湯底轉咗昆布魚湯（另外仲有地獄辣湯、咖哩湯、麵豉湯）。昆布魚湯好清但味濃，味道似用鰹魚粉開；麵底幼曲麵條，鹼水味唔重，有咬口；兩片叉燒望落以為好嚡，但食落又好淋又入味，唔錯；最搞笑有塊火腿；另外配菜好足，有半隻雞蛋、粟米粒、昆布片、蔥花。下午茶時段（3：00-5：00）仲送汽水。咁嘅價錢，味道、質素、份量合格，真係冇嘢可以投訴。吉列豬扒拉麵（$45），default係豬骨湯底，唔油膩，味道反而偏向似中式豬骨湯。吉豬即炸，味道正常。