康記菜館 (Closed)

同朋友去長洲玩咗大半日，決定留低食埋晚飯先返市區，誤打誤撞就嚟到呢一間康記菜館，其實都冇做過research唔知邊間好食，價錢就間間都差唔多，見呢間個阿姐把口又幾得，所以就坐低咗。先嚟個粟米羹，份量都多，每人飲咗一大碗都仲有淨，魚肚配罐頭粟米湯，味道當然好！扇貝就好細隻，而且唔算好新鮮。白灼蝦大小適中，應該都有半斤嘅份量。豉椒炒蟶子嘅汁煮得幾惹味，少少辣，蟶子爽口冇沙。椒鹽鮮魷份量都足夠，應該每枱客都有點呢碟，大人細路都啱食。因為冇蜆，所以叫咗條蒸紅友，肉質一般。小朋友最愛嘅生炒骨，酸味味好開胃。墨魚腐皮卷，就係平時魚蛋類嘅朋友，都ok嘅！最後係清炒生菜，菜夠新鮮，加咗少少蒜蓉，清哂！呢餐風味平民海鮮餐，埋單只需五百幾就有咁多嘢食，都算抵食嘅！