喇沙專門店 (Closed)

自從兩年前去過馬來西亞旅行之後，好耐都無食過喇沙，因為怕香港嘅質素同當地嘅有距離。今次經過西九龍中心，心血來潮就想回味吓，於是就幫襯咗都幾出名嘅喇沙專門店。星期日嘅晚上七點，西九八樓Foot court有幾間舖(包括喇沙店)已經大排長龍，所以畀完錢後，都要等咗大概15分鐘先有得拎。好在店家有準備傳呼器，一有得拎就嗶嗶響，唔駛企喺門口齋等。四十幾蚊有個麵連飲品(紙包飲品轉汽水加2蚊)，價錢都算合理，但食落口先發現質素之高，呢個價錢簡直超抵。湯底夠香夠濃，有少少辣，但唔會辣到痺果隻。麵底同雞扒質素都唔錯。配埋解辣嘅可樂，簡直一流啊！食到咁上下，見佢都拉半閘咯，好似係啲存貨不多賣晒，各位星期六日要試嘅話，最好夜晚7點前到啦。