木船泰國粉麵專門店 (Closed)

呢間泰國嘢真係平靚正！分量多又飽肚，價錢貼地味道又好，性價比超高😋可惜嘅係今次去餐廳冇海鮮，如果唔係都好想試吓佢馳名嘅蝦河粉🥹今次試咗個燒澳洲穀飼牛肉飯，襯埋隻溫泉蛋蛋白仲流緊，撈飯超好食！牛肉本身好香牛味，口感一流，火候恰到好處又唔會太乾，撈埋汁食成碗飯兩三下手勢就扒晒～(但其實好大碗)另外叫咗一個脆單骨雞翼同蔗蝦，雞翼脆卜卜，變埋單骨真係啖啖肉～雞肉都好Juicy好香雞油味。而蔗蝦咬開條蔗有啲蔗糖甜甜地，送住蝦餅食令個炸皮又無咁油，又帶點清甜清新嘅感覺～炒咗一個通菜總括而言，真係冇諗過食泰國嘢可以一個人$100就食到，仲有大大個椰青飲。地點方面亦都好方便，太和站一出行幾分鐘就到，環境坐落亦都好寬敞，而且仲有啲壁畫嘅設計點綴一下，令食客恍如真係置身泰國旅行一樣🤩推介大家想食泰國嘢又想平民價平平地一定要試一試木船！