Video
Read full review
2012-04-23
47 views
土耳其菜係我o既至愛之一. o係眾多土耳其菜館之中,「Istanbul Kebab」係其中一間味道正宗兼水準唔錯o既餐館. 碰o岩上年年底要進修o既關係, 我最初係幫襯佢地o係尖沙咀樂道o既總店, 好味之餘, 總覺得o個度o既價錢實在貴到唔成比例 (可能係因為隔離就係「曼聯餐廳」, 要齊齊捱貴租o既關係啦!) 後來從佢地o既咭片中得知, 係西九龍中心開o左分店, 由於放工就腳, 所以趁呢排去試o下, 睇o下分店水準拍唔拍得著樂道總店.(註: 呢篇食評包含o左今年4月13日同4月17日兩晚o既試菜)新o既分店位於 “西九” 8樓o既美食廣場內 (見上圖), 舖面乾淨企理. 呢度供應o既食品, 差唔多九成以上都同樂道總店o既一樣. 而最明顯o既分別, 就係價錢 - 粗略估計, 同一款食品, 呢度o既售價比樂道總店要平成4成至一半左右! 對我o黎講當然係喜訊, 因為我可以用少o的彈藥去試更多唔同款式o既食品. 我食o左o的乜? 立即介紹:Lavash 「土耳其薄麵餅」 (HK$8; 見上圖): Lavash 就係平時用o黎包 “卡巴卷” o既薄身麵餅. 由於今晚我揀食飯, 所以剩係齋叫一塊
(註: 呢篇食評包含o左今年4月13日同4月17日兩晚o既試菜)
新o既分店位於 “西九” 8樓o既美食廣場內 (見上圖), 舖面乾淨企理. 呢度供應o既食品, 差唔多九成以上都同樂道總店o既一樣. 而最明顯o既分別, 就係價錢 - 粗略估計, 同一款食品, 呢度o既售價比樂道總店要平成4成至一半左右! 對我o黎講當然係喜訊, 因為我可以用少o的彈藥去試更多唔同款式o既食品. 我食o左o的乜? 立即介紹:
Lavash 「土耳其薄麵餅」 (HK$8; 見上圖): Lavash 就係平時用o黎包 “卡巴卷” o既薄身麵餅. 由於今晚我揀食飯, 所以剩係齋叫一塊薄麵餅試真o的佢既味道. 手上o既呢塊Lavash, 可能因為直接“叮”過o既關係, 比較乾水, 餅身變得硬, 無o左Lavash新鮮做起時應有o既煙煙韌韌感覺. 比較失望. 下次食佢, 一定會以卡巴卷o既形式去食, 因為加熱時有錫紙封住, 唔會咁易乾哂水.
Cecik 「青瓜乳酪」(HK$20; 見上圖): 屬於餐前o既開胃小品. 顧名思義, 佢係用稀o既乳酪混入青瓜粒、蒜蓉、蒔蘿、同薄荷調製, 面頭淋上薄薄一浸橄欖油同紅椒粹用o黎裝飾同調味. 用羹拂起, 見到一粒粒o既青瓜同蒔蘿混集其中(見下圖):
佢非常足料. 食落口, 乳酪一o的都唔酸, 雖然溝淡o左, 口感依然豐富, 蒜蓉o既味道滲入乳酪, 好sharp而並不搶喉. Very good! 青瓜粒同蒔蘿令乳酪帶有清涼o既感覺, 撈埋o的橄欖油同唔辣o既紅椒粹一齊食, 呢個「青瓜乳酪」作為餐前小食或餐後消滯都咁一流! 滿分!
Turkish Salad 「土耳其沙律」(HK$32; 見上圖): 份量相當大堆頭, 足夠三個人分! 材料有蕃茄、青瓜、生菜、紅蘿蔔絲、紅椰菜絲、紅洋蔥絲、土耳其羊奶芝士 (Beyaz Peynir) 同青橄欖, 面頭灑上少少紅椒粹, 而土耳其沙律汁就沉左o係低. 由於太多料, 我要用另一隻空碟分細o的份量至可以撈勻o的沙律o黎食(見下圖):
撈好o既沙律, 材料樣樣新鮮, 由檸檬汁同橄欖油做成o既沙律汁唔算多, 味道清新, 好鍾意佢o的檸檬味. 另外我最欣賞o既就係o的羊奶芝士, 粒粒好軟好滑又唔會好鹹, 真係好味到唔識形容 , Feta Cheese都唔及佢咁好食. 成個沙律好食抵食夾大件, 滿分!
Adana Kebab 「亞丹娜串燒免治羊肉卷」(HK$48, 跟土耳其飯同新鮮沙律; 見上圖): 呢個原自土耳其南部城市亞丹娜o既串燒, 係用羊肉混入羊尾脂同紅椒, 以人手剁成肉醬, 再用烤針串起放係爐上烤熟.眼前呢碟Adana, 羊肉卷串燒仲跟埋一條烤熟o既青辣椒同兩件烤蕃茄, 係好地道o既土耳其式製法. 串燒同飯都淋上o係卡巴卷都用到既 “三色醬” - 白色o既乳酪蒜蓉醬、綠色o既薄荷乳酪醬、同埋橙色o既土耳其辣醬, 加埋一份土耳其沙律, 單係份量就已經多過樂道總店成四分一有多, 真係未落肚先興奮. 羊肉卷食落口(見下圖):
羊肉肥瘦均勻, 免治得o黎, 甘香又有煙韌, 證明佢係人手打造不經機器, 難得! 裡面o既粒粒紅椒滲著醒神o既辣味, 呢度o既亞丹娜串燒實在做得好出色同好好味! 青辣椒同蕃茄烤得岩岩好, 保持濕潤; 土耳其飯煮得軟綿棉, 所有食品再合配埋 “三色醬” 一齊食, 可以話係近乎完美o既味覺體驗! 讚!
Mixed Lamb & Chicken Kebab 「羊肉及雞肉卡巴」(HK$45, 跟土耳其飯同新鮮沙律; 見上圖): 我鍾意卡巴肉配飯多過圈埋一舊o既三文治, 所以就要齊兩種卡巴肉連土耳其飯一齊食. 呢度o既轉轉燒水準唔錯, 卡巴雞肉(見下圖):
慢火烤熟, 保持住汁同油份, 夠晒軟滑. 而卡巴羊肉(見下圖):
經過慢火暖烤, 又淋又香. 食完又飽又滿足, 我完全滿意雞、羊、飯呢個配搭. 總結: 呢間分店食品o既水準同尖沙咀樂道總店不相伯仲, 一樣咁好. 講份量, 呢度多過總店好多; 講價錢, 呢度平過總店好多. 呢度貫徹o左土耳其菜 平、靚、正o既優點, 以後都唔洗返去樂道總店捱貴菜, o黎呢度食就okay啦!
Post
