新蔡潤記魚旦粉麵 (Closed)

又到星期六，放工返到大埔唔係新蔡就舊蔡 ~ 先去舊蔡，見人頭擁擁，想企係度等位都唔得，唯有轉去新蔡啦，唔洗等就有位坐喇，希望有驚喜啦 ~自製辣椒油，夠香夠辣，每次都要兩大碟先夠我食一碗麵，其實真正既主角係辣椒油。唔知點形容嗰種吸引既味道，好鮮、清新、濃郁、蒜香、辣椒香、刺激、勁辣 ﹗魚蛋鴛鴦加底加皮，啲魚蛋真係一次比一次差，口感又腍又散，就算無牙都食到呀，依家連魚片都一樣，點解變成咁架？真係食材價格高漲，要偷工減料、加多少水？質數、好食最緊要，為左保持高水準出品，我諗食客都唔會價意加價，最緊要好食。依家每食一次，評分就越低，有咩可以幫到手呢？粉麵都係批發提供，所以質量一向都保持，只係睇吓師父啲煮麵手藝到唔到加啫。粉口感滑，但幾硬淨吓，無左以前棉滑既口感，其實將湯既溫度稍為提高，烚多幾秒已經做到，貪快係咁意拖一拖，點會煮到好河粉。熟麵就煮得幾好，嚥靭彈牙有趙口又保持蛋香，正。好多食家係食評度話炸魚皮又燶又硬，其實依個係正常傳統既炸魚皮，同薄薄一塊似薯片既完全唔同。依隻淨啡色硬屈屈係要先放湯，將部份浸軟及吸湯，食既香脆又夾雜住軟軟既口感，索晒湯既精華，剛好平衡返佢既咸味，係好好食架。