王牌冰室 (南豐紗廠) (Closed)

茶餐廳嘅價錢，配合一絲不苟嘅懷舊冰室設計，充滿舊日情懷，未食嘢已經有啲鍾意呢度。 我哋三行人行完紗廠一圈，去到3樓見到呢間咁靚嘅王牌冰室，門口售賣啲茶飲又咁有特色，好快就一致決定入去食晚餐。我揀咗我每逢去冰室必食嘅瑞士雞翼公仔麵，加多$4 轉做我以前成日食嘅福麵，好懷念。瑞士雞翼好正，咸甜平衡剛剛好，不過如果再淋一啲我就更鍾意！  兩位朋友就話要嗌中式小菜同碟頭飯，真係好麻甩。不過原來呢度嘅炒滑蛋叉燒蝦仁雙拼炒飯係王牌，用咗特濃牛乳去炒，朋友畀我試咗啖，啲蛋真係特別好食。蝦仁大大隻，好足料。另一位朋友食嘅係西檸雞，啲西檸甜酸調校得好好，又炸得夠脆，個餸$68，加多$15 就有飯、湯同飲品。其實咁靚嘅環境，影相打卡都好正，啲嘢食仲要咁平。雖然跟餐有嘢飲，但最後我哋都係忍唔住喺店外嘅茶飲counter 嗌咗3杯，包括：清香桂花凍普洱、王牌鮮果茶、黃金奶蓋。最吸引我嘅係杯黃金奶蓋觀音王！奶蓋飲得多，但將咸蛋黃加入奶蓋呢度應該係第一間，我冇理由唔試。咸蛋黃嘅味道撞落奶蓋，原來都幾夾，配合個清香嘅茶底，濃郁但唔會膩。食完飲埋嘢人均都係約$70+30 ＝ $100 咋。我只會勸大家一句：小心上癮。