微醺 (Closed)

SOHO區眾落唔少酒吧，一般三四點先開始營業； 午飯時間經過橫街，如果唔係店員喺門外招徠都唔知呢度原來有做午市。以中環區以言屬於中等偏高，連加一近兩百嘅SET LUNCH包沙律餐湯餐包、一份主菜以及餐飲；門口屬開放式，炎炎夏日下空調略有不足，餐廳後有室外座位，遇著秋分時節置身其中感覺應該會幾休閒舒適。店員奉上餐牌時亦有介紹熱門菜式，如risotto同all day breakfast；最後決定試試比較考驗功駕嘅risotto同偏向輕盈嘅salmon fillet。先上枱嘅係呢道擺碟精美嘅沙律，加咗鮮果更清新；餐包口感鬆軟，味道可以想像如其外觀淡橙色澤般帶淡淡茄酸，無一般餐包咁清寡。是日餐湯為粟米忌廉湯，入口有粒粒粟米糜，但可能因為無warm up住嘅緣故，溫度算不上微溫。Risotto煮得有咬口，又不至於過硬，粒粒飽滿又入味，酸酸甜甜惹味得嚟無飽滯感；配料都幾足，三文魚塊拌入飯中令整道菜更豐富，可惜青口偏細隻。三文魚扒表皮煎得非常香脆，調味清淡，無掩蓋食材原味下絲毫無腥味；以菠菜墊底，混合魚油油香，再加上車厘茄同西柚，食落更清新開胃。食飽後飲返杯冰涼嘅咖啡，非常解暑。