慶記 (Closed)

朋友話利奧坊附近係咁開咗好多唔同嘅新式餐廳，特登帶我嚟覓食。新嘅餐廳真係好靚，全部落地大玻璃裝修，感覺好舒服。由於我當日想食粉麵類，於是就揀咗呢間慶記啦～餐廳有好多種唔同款嘅面類可以選擇，而且全部用電子落單方便又快捷。口水醉雞捲：推薦大家可以食呢一款小食，因為佢個口水汁可以另上，變左一次過可以食兩款唔同嘅味道。口水汁香辣濃郁，點左就當口水雞食；唔點口水汁就變咗醉雞捲，淡淡嘅酒香味，啱晒唔食得辣嘅朋友。香酥排骨拼滷肉湯飯：香酥排骨新鮮炸起，咬落去仲係脆嘅，湯飯亦都好特別，有少少酸菜又幾好味。茶燻煎軟雞慶面：塊雞扒係要用茶醃製，味道好濃郁，而慶面係屬於清淡嘅風格，一齊食好夾。生煎胡椒包：呢個極力推介，即叫即整，包面係軟而個底煎到脆卜卜，最驚喜係佢入邊係有好多湯汁，食嘅時候一定要小心，黑椒味亦都好重，冬天嚟食一定好正！總括而言，呢間餐廳質素唔錯，住附近嘅朋友仔可以試吓～