金牛苑法式越南菜(香港)

Open Now

Now Closed

金牛苑嘅「南乳燒雞」係必食推介🤩我哋每一次去都會嗌！今次見到午市套餐已經有南乳燒雞，所以就叫個套餐。不過實在太好食喇，我哋於是再嗌多半隻！南乳燒雞外皮燒得「令立立」，一啖咬落去仲「脆卜卜」，真係做到皮脆肉嫩。其實唔沾個南乳汁已經好好食，不過沾埋就更加滋味無窮😋重點介紹完個燒雞之後，講返個套餐。個四人餐仲有拼盤（春卷、牛肉蝦餅、扎肉）、南瓜海皇羹、馬拉盞炒芥蘭、蝦仁扎肉乾炒檬同甜品。拼盤嘅春卷同埋牛肉蝦餅都炸得好脆，放咗一陣先食都唔會淋晒。個扎肉嘅胡椒粉就多咗少少，小朋友食唔到。南瓜海皇羮好足料，有蝦肉、蟹肉同帶子。味道香甜濃郁，飲完都飽咗一半。馬拉盞炒芥蘭炒得好惹味，唔會太鹹，不過啲菜梗就好似多咗啲😆蝦仁扎肉炒乾檬炒得乾身有鑊氣，蝦仁亦都好大隻而扎肉都係同拼盤嗰一款，好重胡椒味。甜品就係糖水或椰汁拉糕，我哋揀咗拉糕。細細塊，煙煙靭靭都做得唔錯。環境方面，我特別鍾意金牛苑有獨立洗手間而且非常乾淨！（哈哈，呢一方面都好重要😆）餐廳分開三層，如果推BB車就唔係好方便。一係泊喺門口，一係就要拎架車上樓梯。