泰COOL (鴻圖道) (Closed)

放工趕住去上堂，頂到9點終於有晚飯食，喺附近見到有泰國菜，二話不說衝入去。門口有有兩尊泰像，一睇就知有泰菜食。冬蔭功夠酸夠辣，落咗唔少香料，幾開胃。除咗蝦之外仲有好多魷魚，頗為足料。咖哩軟殼蟹係我哋最鍾意嘅一道，用嘅係黃咖哩，味道偏甜。軟殼蟹炸得酥脆，而且都唔細。配上香滑嘅咖哩，餸飯一流。馬拉盞炒通菜亦唔錯，非常惹味，同樣係白飯殺手。最後為咗獎勵自己，我哋叫埋芒果糯米飯，糯米飯由三色飯組成，帶微鹹，椰汁味道好香，芒果亦算香甜，為忙碌過後嘅晚餐劃上完美句號。