Good Good (Closed)

我哋2日前先決定去食，即刻上網訂位，點知full哂。朋友前一日去睇，好好彩有人取消咗booking，我哋先可以成功訂到位。當日午餐時段都幾full，連bar枱都坐滿人。上層樓梯位置放有餐牌同水壺、杯，食客可以自己去斟水飲。五目天丼 ($118)食材有羽衣甘藍、南瓜、茄子、秋葵同溏心蛋。天婦羅表面撒有海苔粉。羽衣甘藍天婦羅勁好食，好脆口、好香海苔嘅味道，感覺似食緊紫菜味薯片。飯底淋咗豉油，鹹鹹哋幾好食，份量適中。溏心蛋相對比較普通，冇流心嘅效果，口感似烚蛋。麵豉湯嘅配料有白蘿蔔、海帶、白靈菇。配菜有醃黃芽白同昆布豆腐卜，兩樣都幾好食。夏日狂桃 ($88) (只賣到8月尾)底部白色嘅部分類似焦糖脆餅，味道甜甜哋，入口即化。脆餅上面放咗一層薄嘅蛋糕，被杏仁片圍住。將甜品不同部分一齊食，會食到有橙香，感覺幾清新。最表面放咗白桃，白桃味道爽甜。