潮膳 (Closed)

之前聽同事講話灣仔開咗間潮州菜館非常好食，今日決定同同事收咗工特登去試一試！去到餐廳發覺入面裝修好新，應該開業冇耐！佢入面座位都好寛敞，坐得好舒服，之後我地已經等唔切開始叫嘢食！首先上菜係佢地招牌菜蔥油雞，肉質好嫰滑，好新鮮，而且啖啖肉，唔似出面都係骨多肉少，最重要係份量夠多，雖然我地只叫半隻，但俾3個人都完全夠食！之後上既菜係韭菜豬紅，呢個菜已經好耐冇食過，味道好懷念，豬紅好新鮮，豬紅煮得林林地，食落好有口感，而且醬汁入唒豬紅入面，好入味，配埋韭菜味道一流！之後再上埋個普寧豆腐，呢個菜味道偏向清淡，豆腐煮得外實內軟，口感一流！最後到重頭戲，就係佢地既甜品鼠穀粿，係我同事極力推薦，佢個外型呈黑碳色，外層炸得鬆軟甘脆、食落好有嚼口，口感類似糕粑質感，而且味道不是太甜，大人小朋友都好啱食，夠健康！