小火焰韓式咖啡廳 (觀點中心) (Closed)

今日嚟到呢間韓式餐廳食晚飯，已經晚上七點半，仍然有人排隊等入位，可見呢間餐廳嘅名氣。同朋友叫咗兩個主食同一個小食：韓式甜辣年糕炸雞半份（$88）、辣炒猪肉蓋飯（$78）同燴牛肋淮山麵（$68）。韓式甜辣年糕炸雞，睇落去賣相非常之邪惡同吸引，炸雞同年糕上面沾滿韓式甜辣醬汁，炸雞有先用胡椒、香草醃過，再沾上粉漿拎去炸，外皮炸到好酥脆，雞肉亦都好滑嫩，但重點係個醬汁非常好食，食落偏辣帶點甜味，好惹味開胃！而年糕好煙韌，同醬汁好配搭，非常推薦！辣炒猪肉蓋飯，配料有炒五花肉、紫菜、紅椒、翠玉瓜、泡菜同韓式拌飯醬等，食之前同將佢哋拌勻，食落帶點微辣，表現中上。燴牛肋淮山麵，燴牛肋煮到好入味，食落去質感似豬軟骨，而麵條條分分根明，唔會煮到好爛，但麵條無彈牙口感，湯底亦都表現中庸，唔會特別推薦。