Felice Cafe & Pasta (Closed)

年二十九，約咗朋友行維園花市，去之前食個lunch先。好耐之前嚟過呢間餐廳食Dinner，印象中嘢食唔差，今日就帶朋友去試吓，原來佢哋有午市套餐，選擇都唔少，佢哋應該會一段時間就會轉餐牌，而且款式都幾特別，今次去食，同上次去完全唔同。睇吓今次有咩特色意粉先，冬陰功忌廉海鮮扁意粉？個名好特別，唔知好唔好食呢，鍾意試新野嘅我梗係要試吓先啦，穩陣起見再叫多個燒汁豚肉意粉，每個餐都包沙律&飲品，可以加錢轉特色咖啡或特飲。冬陰功忌廉海鮮扁意粉 - 有驚喜，望落似白汁意粉，食落有強烈冬陰功味道，會食上癮，必食！燒汁豚肉意粉 - 賣相還可以，但係味道超好食，醬汁味道好，食完冬陰功，再食呢個，都食得到燒汁味道。好特別，食完燒汁豚肉意粉，再食返冬陰功忌廉海鮮扁意粉，又有另外一種味道。今次試咗佢哋ice mocha & 黑糖鮮奶咖啡，2樣都唔錯，咖啡味道濃郁，不錯選擇。餐廳位置不多，但客人好多，所以都要等位，我哋好好彩，等咗大約10分鐘就有位，價錢實惠，高質食物，特別鍾意佢哋嘅意粉，煮得好好味，值得推介。