Dear Coffee & Bakery (Moved) New Location

距離舊年到訪呢間麵包店應該已經超過半年，其實一直想再黎，只係地點唔算好方便我，無辦法啦。呢段時間都有追蹤小店嘅社交平台，成日見到各款麵包，好吸引，竟然仲見佢地新年都開門，難得另一半又肯陪我顛，大年初二坐車過黎，下午茶時間人流好旺呢，店內位置唔多，所以我都叠埋心水，諗住慢慢等。等候途中，由玻璃窗見到麵包櫃嘅包點愈黎愈少，只係得番3個，我決定唔等喇，直接外買番屋企食，哈哈，驚再等最後嘅包都冇埋嘛。所以都好開心，買到兩個包，本身都想堂食飲埋咖啡，唯有下次再搵機會黎雙色麻糬紅棗貝果 $38呢款係應節嘅賀年版貝果，麵糰都加有紅棗，但冇令貝果口感變粗，由於我懶得再加熱，直接即食。貝果體偏鬆軟，麵包狀，淡淡紅棗香滲出，切開兩邊藕斷絲連，可見滿滿麻糬內餡。除左原味，另有紅棗味麻糬，做出雙色效果，麻糬量多，口感軟糯，質地黏身，帶紅棗香甜，好食無誤紫薯包 $33當然係被咁靚嘅花花造型吸引，麵包幾墜手，面頭灑上黑芝麻，麵包口感極柔軟，好似豬仔包咁。烤熱再食，應該更加美味。我幾鐘意呢種麵包質地，好實在。紫薯份量唔少，濕潤唔乾， 薯味要好認真咁嗒先食得到，無乜添加，味道淡啲，唔會好甜。