阿肥火鍋 (Closed)

去到餐廳門口見到門面唔大，以為入面都會係細細間舖咁，點知原來落咗樓梯之後，入面都好大，仲有好多古舊年代嘅裝修。餐具都係用懷舊款式，係最classic嘅雞公碗碟。打邊爐之前叫咗D小食，沙薑雞腳，口感爽脆，食少少開下胃先。點了麻辣拼鮮茄蝦湯鍋，麻辣開始時都唔算太辣，但係越煲越辣，好彩有另一款湯去淥菜，唔係D菜就食都食唔到啦。點了牛皇拼盤，幾樣牛肉入面手切肥牛比較好味，肉質嫩口。牛柳粒就失色咗，淥完比較硬，可能係我地煮得太耐啦。 其他四寶丸、生根、豆腐、生菜等配料質素都好好。餐廳除咗裝修花心思之外，選取食材都有用心。