蓮香樓 (Changed Hand) New Restaurant

今日LUNCH頭痛緊去邊度醫肚嘅時候﹐個同事就提議話不如去 ”蓮香樓” 啦﹐因為聽聞好似要執定係搬﹐所以就趁佢執或搬之前去食多一次 ~~ 根據同事之前去嘅經驗﹐搵到位都必須要等好一陣子﹐所以今次去已經做好起碼要等半個鐘先有得開餐嘅心理準備｡ 去到蓮香樓﹐果然不出所料﹐已經人頭湧湧﹐要自己埋檯等位﹐果然係好舊式嘅茶樓｡驟眼睇睇﹐其實都幾多旅客黎食｡ 而第一次黎幫襯嘅我﹐對於佢入面嘅環境都覺得好新奇﹐尤其係牆上掛住嘅餐牌, 價錢仲係用緊中國花碼數字列出｡坐低左之後﹐同事同我講點心係要出去攞﹐所以一見到有點心車出﹐個個都蜂擁而上﹐次次食食下都要忙住衝出去拎點心﹐好鬼累｡ 我地一行3人叫最後食左 6 個點心: 蒸牛肉球、鵪鶉蛋燒賣、糯米雞 (好特別﹐值得推介﹐因為入面充滿好香嘅燒肉味) 、馬拉盞、蒸排骨 (肥膏比較多) 、魚肚扎 (同棉花雞差不多)｡ 想試嘅豬潤燒賣、鳳爪、千層糕﹐今次都係食唔到｡｡｡ 3個人最後埋單2百元正｡