加多樂冰室 (Closed)

平時喺新蒲崗番工都唔覺有呢間野，有日同事話想試下，我心諗，四十蚊左右一個餐，同出面差唔多啦，如果味道唔太差都叫合性價比丫，試下亦無妨。入到去，好似幾乾淨下，唔似普通茶記feel，比傳統冰室多咗一份modern感，燈光唔會過猛，D櫈都幾靚仔(我鍾意坐硬櫈多啲，唔怕上一手整濕咗都唔知)。望住Menu，都係啲冰室會有嘅野，價位好似都幾合理，最後嗌咗個「常餐」，雪菜肉絲米跟雙煎太陽蛋同埋我至愛嘅多士，跟餐飲杯熱檸水都唔洗加錢，四十蚊攪掂，而且上菜都尚算快，速食lunch一流。常餐(雪菜肉絲米/雙煎太陽蛋/多士)($39)算係咁啦，米粉大大碗，粗身啲，唔怕太硬哽胃，雪裡紅唔梅唔散，好新鮮爽口，嚼勁十足；雙煎太陽蛋內外合格，唔歡喜仲可以轉炒蛋又得，荷包蛋亦得；至於多士喇喎，一個字「熱辣辣卜卜脆」，絕對吸引到我回頭再食！薯仔雞翼飯($43)呢個係同事叫嘅，望落好似都好大碟，份量十足，佢仲話好有家嘅味道，食到上哂癮咁話。我都食咗兩三啖，又真係幾住家飯feel，唔太濃唔太清，唔覺有味精，岩岩好，勁想偷多佢一舊薯仔同雞翼食呢。