Video
Read full review
2022-10-18
1210 views
性價比極高、老字號蛋包飯💎推薦分數: 8.5/10———————————————————唔知大家鍾唔鍾意食蛋包飯？不過香港嘅蛋包飯好多時都唔係蛋包飯，而係蛋蓋飯，因為對我來講蛋包飯應該係完全覆蓋個飯，而且一切開會流哂出嚟。今次介紹既呢間都唔算係正宗蛋包飯，但佢應該係香港最抵食嘅蛋蓋飯。華記士多係一間喺西灣河嘅老字號大排檔，主打平民價錢嘅咖喱蛋包飯，位置喺西灣河嘅後巷，令到蛋包飯成為西灣河嘅名物。店舖淨係賣三款嘢食，最簡單嘅蛋包飯包埋嘢飲，所以非常抵食，咁多年嚟都係加咗好少價。餐廳嘅位置有少少隱蔽，喺大街轉入去嘅後巷，真係行過都唔覺嘅小店。餐廳堂食位置就係喺後巷，所以係非常地道，如果對環境有要求、唔想坐喺街度，咁依度就唔係好適合你，因為係露天後巷，所以夏天應該會幾熱。店舖嘅嘢食一張Menu睇晒，芝士咖喱蛋包飯、咖喱蛋包飯同台式滷肉飯，所有飯都會包一杯嘢飲。-1️⃣ 咖哩蛋包飯 （👅: 8/10）外觀睇落去非常吸睛，因為佢蛋睇落去好滑，而且有好多咖喱汁，如果係堂食會更加澎湃，如果切開個蛋包飯，就會見到豉油雞肉炒飯，不過隻蛋就冇流出來，大細就好似一碟碟頭飯，滑蛋同咖喱份量都算多，如果女仔食可能會
💎推薦分數: 8.5/10
———————————————————
唔知大家鍾唔鍾意食蛋包飯？不過香港嘅蛋包飯好多時都唔係蛋包飯，而係蛋蓋飯，因為對我來講蛋包飯應該係完全覆蓋個飯，而且一切開會流哂出嚟。今次介紹既呢間都唔算係正宗蛋包飯，但佢應該係香港最抵食嘅蛋蓋飯。
華記士多係一間喺西灣河嘅老字號大排檔，主打平民價錢嘅咖喱蛋包飯，位置喺西灣河嘅後巷，令到蛋包飯成為西灣河嘅名物。店舖淨係賣三款嘢食，最簡單嘅蛋包飯包埋嘢飲，所以非常抵食，咁多年嚟都係加咗好少價。
餐廳嘅位置有少少隱蔽，喺大街轉入去嘅後巷，真係行過都唔覺嘅小店。餐廳堂食位置就係喺後巷，所以係非常地道，如果對環境有要求、唔想坐喺街度，咁依度就唔係好適合你，因為係露天後巷，所以夏天應該會幾熱。
店舖嘅嘢食一張Menu睇晒，芝士咖喱蛋包飯、咖喱蛋包飯同台式滷肉飯，所有飯都會包一杯嘢飲。
-
1️⃣ 咖哩蛋包飯 （👅: 8/10）
外觀睇落去非常吸睛，因為佢蛋睇落去好滑，而且有好多咖喱汁，如果係堂食會更加澎湃，如果切開個蛋包飯，就會見到豉油雞肉炒飯，不過隻蛋就冇流出來，大細就好似一碟碟頭飯，滑蛋同咖喱份量都算多，如果女仔食可能會食唔晒。
飯啱啱整好所以係熱辣辣，咖喱應該唔係自家製，好似睇到係用日式咖喱磚，質地唔算濃稠、偏稀身，香味突出，咖喱係有啲似日式嗰種，食落去係比較甜，帶好少嘅辣味。而蛋係半熟狀態，咬落去係非常嫩滑，仲會有蛋汁，食落有蛋香味，同咖喱撈埋一齊食非常之夾。
炒飯係用咗豉油去抄，同平時嘅蛋包飯唔同，雖然加入左港式風味，但係炒飯都算幾入味，有淡淡豉油味，唔會太鹹，飯唔算太濕潤，都算乾身，係粒粒分明，偏硬身小小但唔係未煮熟。
炒飯入邊仲會有雞肉，雞肉份量都唔少，每一啖都可以食到雞肉，雞肉有醃過，表面有焦香過，肉質唔算好嫩都唔算老。略嫌個飯好似唔夠熱，同埋如果個飯可以炒得有鑊氣啲，或者攞去焗一焗會更好。
-
2️⃣ 芝士咖哩蛋包飯（👅: 8/10）
芝士咖哩蛋包飯就係咖哩蛋包飯加上小小芝士，貴五蚊，會見到滑蛋有小小半溶芝士。不過芝士嘅味道唔算突出，只有小小鹹香，朋友更加唔肯定係咪食到芝士，以為係沙律醬，所以我覺得唔加錢都得，因為唔覺加左，雖然芝士唔會蓋過咖喱嘅味道，無加芝士個飯一樣咁惹味。
-
🍊 橙汁（👅: 6.5/10）
橙汁有啲似武無氣嘅芬達橙汁，係偏甜但又唔係鮮榨橙汁。
-
🍋 檸汁特飲（👅: 7/10）
檸汁特飲飲落酸酸甜甜，但感覺係人工嘅味道。
-
🌟蛋包飯來講佢未算話好食到好有驚喜，但呢一個價錢來講真係非常抵食，冇嘢好要求，如果喺附近返工真係窮人恩物，芝士我覺得唔加都得，如果係特登去就未必，但係附近經過或者掃街都可以考慮。環境方面如果你唔介意咁有風味嘅地方，係可以一試，我自己都好鍾意食大排檔，所以冇咩所謂。不過如果食緊個時撞正店舖清潔，聞到啲漂白水味就唔係咁開胃。
-
👅味道: 8/10
🍴環境: 6.5/10
=========================
Post