醋娘子 (Closed)

依家香港嘅中菜小店買少見少，食一餐可能要$200至＄300，不過今次我哋搵到間上環嘅上海菜小店。醋娘子距離上環地鐵站只有一條街，地理位置方便。餐廳幾受歡迎，我同女朋友係六點半左右坐低左後開始多人，亦見到外國人光顧。我哋叫咗小籠包，鐵板回鍋肉，醉雞冷麵同兩杯凍豆漿。小籠包好juicy，一咬落去啲肉汁就湧出嚟，皮嘅厚薄程度亦都啱啱好，而且價錢便宜，＄26就有4粒小籠包，抵食! 鐵板回鍋肉辣味十足，多肉少配菜，送飯一流！食完比較鹹嘅回鍋肉，當然要食個比較清淡既醉雞冷面中和番。麵同汁分別選擇上海麵同芝麻醬，值得一讚嘅係醉雞。肉質唔硬唔鞋，完全冇骨，充滿酒香，煮得恰到好處。食上海菜當然要叫豆漿啦！豆漿唔會太甜，啱晒減肥嘅我哋要特別稱讚店員嘅服務態度，佢哋好耐心解答問題，仲好貼心。最後呢一餐大約＄200左右，絕對會再encore！