薈亞廚房 (Closed)

早兩日同個朋友行街shopping，喺新都城行到攰攰地又餓餓地，於是就喺商場裡面搵野食喇！初初行過見到薈亞廚房，裝修都幾新淨，初初仲以為係西餐廳，睇睇menu先發現係薈萃亞洲菜色嘅餐廳。兩個人緊係嗌個二人套餐啦，乜都有之餘又夠飽！先嚟一個椰子煲雞湯，有蠟燭仔喺底下保持湯嘅熱度，個湯非常足料，好多椰子片，啖啖濃郁鮮甜嘅雞味，椰子同雞嘅配搭非常開胃！我係一個無辣不歡嘅人，跟住上嘅係馬拉盞炒通菜，菜好新鮮爽口，朋友覺得辣度剛剛好，我就鍾意再辣小小。精選三小拼有驚喜，炸薄脆蝦餅脆得嚟之餘又唔會太油，蝦味又夠，食完好想encore再食多次！主菜係秘製去骨海南雞配雞油飯，秘製整嘅雞皮好香，雞肉亦都好幼滑，我建議大家試下唔點醬，就可以細味到廚師秘製嘅香味。