火狐爐端燒 (Closed)

今日同朋友去完荃灣shopping之後喺附近搵嘢食，大家又唔算話好肚餓，但係又想搵個地方坐下食少少嘢，喺附近見到有間舖頭係食爐端燒，大家都話想去試下。店內唔算好大，主要都係食串燒為主，見到牆上仲有秋冬特選迷你火鍋添，所以我哋都揀咗個寄世海鮮鍋試下。寄世海鮮鍋材料都幾豐富，有蝦🦐、蟹柳、帆立貝、蜆、娃娃菜、菇同埋竽絲，啲海鮮都好新鮮，帆立貝同埋蜆都好大粒，最重要係個湯底，雖然只係清湯，但個湯吸晒所有海鮮嘅味道，變得好鮮甜，我都忍唔住係咁飲！串燒方面揀咗至愛嘅和牛串、黑豚五花腩同埋冬菇串，和牛肉嫩多汁，和牛味頗出；黑豚五花腩肥瘦得宜，唔會話肥得太過份，帶有少少肥膏嘅香味，加少少檸檬汁一流呀；冬菇串燒得夠乾身，但咬落去依然保存到juicy嘅口感，上面仲有啲木魚絲喺度郁下郁下，味道不錯不錯！我哋仲叫咗個燒墨魚餅，見到個賣相都好靚啦，金金黃黃，帶點香口嘅感覺，墨魚肉新鮮，爽口又彈牙。今次因為大家都唔太肚餓，所以都叫得唔太多嘢，其實都仲有好多款串燒想試下架，有機會再嚟試過其他款式先。