鮨秀 (Closed)

今日放假同老婆去咗銅鑼灣食omakase 午餐，位置放便喺希慎廣場附近.呢度嘅午餐定食有幾款（9件壽司/12件壽司、幾款唔同嘅海鮮丼）我哋唔係太肚餓所以揀咗壽司9貫。前菜係沙律同蒸蛋，蒸蛋有好香嘅冬菇味，蒸蛋嘅表面透明，有一層淡香冬菇味汁。沙律汁係自家製果味汁，酸酸甜甜定蔬菜更加好味。九件壽司各有特色：左口魚、白間、油甘魚、甜蝦（剁碎左既甜蝦加了魚春、上面仲加左炸櫻、北海道銀雪魚（新鮮，冇急凍過，食得出淡淡既油香）、醬油漬呑拿魚（醬油漬將吞拿魚表面嘅水份逼佢出嚟，令魚嘅鮮味更加香，上面仲加咗漬物調味）、魚子（師傅先清洗再調味，完全冇腥味仲好甘香）、北海道海膽（非常新鮮，每一件都非常清甜）、拖羅手卷（壽司飯加咗木魚碎，拖羅嘅表面再加左天婦羅碎）。壽司飯加入赤醋，令到壽司嘅味道香濃冇需要再加任何調味。最後老婆揀咗麵豉湯我就揀咗烏冬（涷），烏冬麵條好食，口感唔錯。最後甜品係焦糖雪糕同埋開心果雪糕，兩款雪糕味道唔錯尤其是係開心果味雪糕果味香濃。