僕之拉麵 (Closed)

餐廳對自己超有信心😂門口有塊木牌寫著：「在這世間裹，我們唯一做不到的事，就係令你失望」，仲要免收加一，吸引左我入去食。木系裝潢為主，牆上掛著日本主題既畫，播放日本歌曲，有種係日本小店食拉麵既感覺。以豚骨湯為基礎，可選濃湯或清湯，清湯可再選醬油/鹽味。個人較中意濃湯，面頭有層薄薄油脂，飲落較厚醇，掛麵能力都高啲。朋友簡左醬油清湯，湯底清澈，較強調鹹味。🔸肉食者拉麵 $120 ‼️推薦‼️抵食之選！材料豐富，未計全隻溏心蛋同角切叉燒，一碗有約6-7塊薄叉燒，出面呢個價可能只有3塊。叉燒採用西班牙梅肉，偏瘦帶少許筋位，肉質軟又唔會鞋口，有陣淡淡既咸味，覺得配濃湯比較夾。🔸特選拉麵 $135一大條叉燒放係拉麵上，仲長過我手掌，好IGable。同樣選用來自西班牙既豬，不過今次用豬腩位，較肥美，再用火槍燒過，迫啲油脂出黎，配清湯拉麵一流。溏心蛋黃透紅流心，蛋白嫩白，食埋真係超飽。🔸炸章魚 $30約有7、8塊章魚。炸粉乾爽薄脆，章魚炸得剛好，捕捉到岩岩由透明(生)轉白(熟)既moment，咬落彈牙。唔使加檸檬汁都唔覺太油膩。另外見到有期間限定海老拉麵，一碗有成約10隻蝦，每日限量15碗，打算下次試下。