Give Me 5 (Closed)

觀塘係一個非常多樓上餐廳嘅地方，但想搵間地方大、環境寬敞，就唔係好多餐廳做得到，今日同同事午餐時間嚟到位於鴻圖道嘅Give me 5 食lunch,感覺唔錯。餐廳格局及設計開揚，座位算多，完全唔侷促及感覺悠閒。佢地主打西式fusion菜式。午餐提供主菜+半自助形式任食沙律、餐湯、甜品及新鮮水果，連埋任飲紅、白餐酒，價錢由$75-$138唔算貴，滿足心大心細嘅朋友之餘，又可以試多啲嘢同慳番唔少錢，呢個模式值得推介。沙律吧及生果區嘅食物新鮮，選擇亦唔少，如果見無晒服務員會好快咁refill，抵讚！甜品區有啫喱同蛋糕選擇。美式牛肉漢堡配煙肉及脆炸洋蔥圈漢堡牛肉入口不會過硬或散開，肉汁尚算不錯亦都有咬口配埋煙肉同脆脆嘅洋蔥圈，醬汁比例剛剛好，薯條亦都唔油膩，整體不錯。澳洲肉眼扒配野菌汁點咗5成熟無煎過頭，份量有兩塊，牛味香濃，肉質不錯有彈性配野菌汁味道好夾。餐廳內仲有飛標機同桌球擡可以玩，如果食完悶悶地可以去娛樂一下。另外服務員有求必應，落單上菜速度又快，態度良好。希望能一直保持水準，值得推薦。