迎‧潮 (Closed)

是日豬仔同我去The One睇《復仇勇者》，我提議lunch去飲杯茶，嘆個包 ！近近地係The One揾食，揀咗20樓嘅《迎、潮》！假日大把位，入座後先發覺又係稻香集團添 , 近年稻香集團旗下嘅酒樓，食物質素質量一直走下坡 。不過今次呢間酒樓景觀開揚吸引 ，樓底又高 ，坐得極之舒服又hea，已經加咗唔少分！翻兩翻點心紙，點心款唔算多，但有特色點心……1.酥皮叉燒餐包 : 酥皮菠蘿包，皮夠薄之餘又巧鬆化 ，叉燒肥瘦適中，好好食 ！2.狀元蝦餃皇 : $12一籠一粒大大粒 , 蝦肉爽口！3.香草竹庶蝦 : 炸得香口，蝦膠彈牙，點上泰式甜辣醬後，非常惹味 ！4.尚品四寶燒賣 : 4 款分別係有蝦、有蟹籽、有鮑片及魚翅等，我倆認為4款都咁正 ！5.黑椒金錢肚 : 豬仔話黑椒几辣吓，入晒味，金錢肚軟熟易咬口！6.陳皮牛肉球: 呢碟比較普通，牛肉球都算爽口。7.鴛鴦雙潮$20: 呢籠點心中嘅蝦餃，皮唔得、穿晒嘅！蝦隻又較細！糯米卷還可以，不過唔夠香，又無包花生粒！整體唔錯，今餐算抵食！