黑木亭居酒屋 (金馬倫道)

食物質素幾好，但環境有d迫，待應態度差劣，上菜速度好慢。本身一坐低叫左1份火鍋同1份2貫壽司，諗住睇住份量食，唔夠再加。點知洛完單等左起碼半個鐘都無嘢食，舉手揾待應，待應一係扮見唔到，一係就話轉頭先。成功叫人追單啦，都要等多10分鐘先有壽司食。諗住應該好快火鍋都上啦，又唔洗廚房煮，點知又等左半個鐘，壽司都就黎食完，再追單先至上。食物方面，12貫壽司係廚師發辦，質素幾好，都夠新鮮，不過海膽唔啱自己口味。火鍋叫左椰皇壽喜燒 A5宮崎+M7澳洲和牛寶盒，牛肉有質素好食，不過待應求其放低就走，放位都係我自己放番好，火都要自己開，感覺好差。叫做壽喜燒，但無生雞蛋，失望。要等上曬所有餸要成個鐘頭！好幾枱客人都一樣情況，見到隔離枱等完仲要上錯餸，又要等多30分鐘。2個人埋單8百幾，未係好飽，不過等到無心情再叫嘢食。食物ok，價錢貴，服務差，性價比低。