+5ºC 手抓餅專門店 (Closed)

+5度門面好細，好彩前面係個大空地，有好多位可以俾人等拎嘢食餅底16蚊，有最低消費：每個餅計算最少30蚊起。（記得揀夠30蚊先俾單，唔係姐姐會串你hahaha）食手抓餅無論喺台灣定香港，加雞蛋同芝士係指定動作，但計完數發現係29蚊🤡見爭1蚊就加埋個肉鬆試下。沙律醬或辣椒粉就可以免費加。多數D人買完就會走咗去，我因為八卦就留喺到等，順便睇佢整。一日都唔知要整幾多份，個哥哥已經非常熟手，見到佢D材料都落得好平均。完成一份佢會叫號碼然後同你講多謝哂，見到佢煎到身水身汗我都想同佢講返多謝哂。等咗15分鐘左右就有得拎。岩岩拎上手好熱，第一啖未食到其他食材，淨係咬到餅底。餅底好高質，鬆化得黎表面煎到好脆。大概大大啖第3口就會開始食到配菜，芝士因為餅底夾住咗，熱力岩岩好令佢溶哂。雞蛋加肉鬆，真係好台灣。總括黎講：唔好對比台灣嘅物價，30幾蚊喺香港買到台灣嘅味道，抵唔抵就見人見智啦。