泰拍耶

Open Now

Now Closed

返一日工又weekend，相信唔少打工仔都覺得格外興奮。放工約咗朋友去黃埔睇戲，佢帶我嚟佢屋企附近呢間新開嘅泰國菜，行出地鐵站都唔洗一分鐘就到，非常就腳。餐廳嘅裝修以竹木為主，清新簡約，而且空間感非常夠，枱同枱之間距離都幾寬，背面仲有屏風隔住，感覺好有私隱，好舒服。朋友叫嘅蝶豆花梳打，加上青檸後變成紫藍色，飲落酸酸甜甜，加上梳打感覺清爽。我唔方便飲咁多凍嘢，所以揀咗薑茶，呢杯泰式薑茶好特別，加入咗香茅同蔥，飲落好香，甜度適中，而且唔會好辣，非常暖胃。朋友指明一定要叫嘅青木瓜軟殼蟹沙律，青木瓜偏酸，口感清爽，配上魚露同大量蝦米腰果，感覺好平衡。炸軟殼蟹好酥脆，大大件，咬落去好香，仲有好多膏，好邪惡！炒芥蘭質感爽脆，吸收晒鹹肉同蒜蓉嘅味道，非常惹味。鐵板蠔烙亦係朋友推介，份量都幾足，即叫即整，上枱時熱辣辣，配上泰式辣醬非常香口。蠔仔粒粒新鮮飽滿，食落依然好嫩，同香脆嘅蠔烙形成強烈對比。蠔烙底部墊住芽菜，一來令蠔烙食落冇咁油膩，二來芽菜亦吸收哂蠔烙嘅味道，非常香口，係一個聰明嘅配搭。