新派韓食館 (Closed)

同朋友到呢間新開嘅韓國餐廳食晚飯，可能早到啦，七點幾到，唔使等位就有得坐卡位。餐廳裝修幾靚，有啲復古風嘅擺設，同紅磚鋪內牆，枱同枱之間都擺得鬆動，坐得舒服，又唔會趕人走，食完仲可以傾偈！前菜同湯送嘅泡菜好辣（對於一個唔係好食得辣嘅人黎講）；涼菜無咩味，不過爽口；湯嘅味道似紫菜滾瘦肉湯，呢個算唔算韓式呢？不過野飲好好飲！！！！呢個雙層草莓柚子沙冰有好濃好香嘅草莓味，柚子味又會滲出黎，仲要個冰唔實，飲到攪得到！綠茶泡沫奶香就幾奶，少少甜，底有啲綠茶粉沉底，飲之前要攪下，可能係我叫咗走冰，味道麻麻呢個卡邦尼粉絲年糕經典咯，完全食唔到忌廉味，令成個餸都無味，年糕又過硬，唔煙靭！芝士拉豬仔骨賣相唔錯，有專人過黎幫手，用芝士卷住啲豬仔骨，之後變成下面副圖豬仔骨有少少辣，唔係好食得辣嘅人都頂得順，肉質鬆軟。但是芝士唔係好得，唔知係咪豬仔骨太濃味蓋過芝士味？雖然個芝士係拉到嘅，但是佢唔香又唔咸，有啲失望。侍應見鍋邊蛋熟，會走過黎提你，又問熄唔熄爐，所以個蛋底嗰層好嫩，表面仲硬硬地，好食！鍋邊嘅粟米都好甜。總括黎講，食物一般，服務幾好，環境一流，又坐得舒服！