魂 (Moved) New Location

個日都係一如已往，我女朋友唔知抽起邊條筋話要過海食飯(星期六日，唔洗返工，一般都唔想過海)，咁就諗都無諗揸左架車去銅鑼灣，又諗都唔洗諗就泊左入馬會，因為唔洗錢。一向係拉麵痴的我，當然好直接問佢可唔可以食拉麵，佢竟然話可以，難得佢咁順灘，拿拿聲查下OPENRICE有咩推介，係銅鑼灣的拉麵店原來"魂"的排名係最高。枉我自稱拉麵痴，我竟然唔知，都係有D唔好意思。依家知道左，當然去試下，個時9點左，餐廳外面仲有6個人排隊，不過都等左30分鐘先入到去食，可能舖面太細，一入到去，原來已經LAST ORDER，青龍又SOLD OUT，咁又係唔洗諗，ORDER左 "魂"同"太極"。(我鍾意食拉麵的原因可能係因為無咩選擇，因為我本人有選擇困難症)幾分鐘後就有得食，首先試下湯頭先，之後再試下麵質，叉燒及玉子。1. 湯頭：油脂豐富，香味濃郁，膠質程度剛好，太極的湯頭更有鮮味。2. 麵質：非常一般，似在CITYSUPER買到的，因為我買口過返去煮，麵質差唔多一樣。3. 叉燒：味道不錯，略微再肥一點更好。4. 玉子：都係非常一般，沒有蛋味，又唔流心。食完立即走人，因為太窄，食麵個時都要就住隔壁的食客，好唔暢快。