錦華粥粉麵

Open Now

Now Closed

知道大埔個街市非常之壯觀，我雖然係九龍人都好想入去朝聖一下，於是搭咗成個鐘頭車入去參觀街市，順便搵食。街市地下個肉檔同埋魚檔非常之多選擇，好精彩，如果我屋企樓下個街市係咁就正！二樓就係買乾貨嘅，我哋行咗一陣，就直接去搵食啦。熟食檔位於3樓，店舖非常之多，人流極之暢旺，枱同枱之間非常之迫。基本上好難行人，上面粥粉麵飯樣樣齊，病病地既時間揀左食粥。坐低叫咗碗菜乾豬骨粥同埋鹹肉粽，鹹肉粽叫之前已經問咗阿姐鹹肉粽有冇蛋黃，佢答我有。嚟到之後叉爛咗個粽，好難先揾到粒 蛋黃，粒蛋黃嘅大細得正常嘅四分之一，食咗入口都唔覺，仲有就係有舊肥豬肉，綠豆嘅份量又唔係好多，好彩佢鼓油較得幾好味道食得曬，菜乾粥個菜乾份量都唔少，但只有淡淡嘅菜乾味，勝在無沙…雖然大牌檔啲阿姐忙得不可開交，但係佢哋都好耐心咁招呼…整體感覺還可以。